ຂໍຊື່ນຊົມ ສາວໃຈສູ້ ປູກເຫັດນາງລົມ-ນາງຟ້າ ສ້າງລາຍໄດ້ໃຫ້ຄອບຄົວຫຼາຍລ້ານຕໍ່ປີ

ການປູກຝັງ ແລະ ລ້ຽງສັດຂອງປະຊາຊົນລາວບັນດາເຜົ່າບໍ່ວ່າຄົນໜຸ່ມ ຫລື ກາຍໜຸ່ມແດ່ແລ້ວກໍ່ດີບໍ່ວ່າຈະຢູ່ໃນເມືອງ ຫລື ຊົນນະບົດ ຖືວ່າກາຍເປັນຂະບວນການພົ້ນເດັ່ນ ເປັນຂະບວນການທີ່ມີຄວາມຫວັງຄວາມຫວັງຂອງການຫລຸດພົ້ນອອກຈາກ ຄວາມທຸກຍາກ ຊຶ່ງເມື່ອຈະຂຽນເລື່ອງນີ້ແລ້ວກໍ່ບໍ່ພາດທີ່ຈະເລາະໄປຫາມາບອກເພື່ອຈະເປັນສ່ວນໜຶ່ງໃຫ້ທ່ານຜູ້ອ່ານທີ່ຍັງຫາຫົນທາງອອກໃນການທຳມາຫາລ້ຽງຊີວິດບໍ່ທັນໄດ້ເທື່ອ ຫລື ອາດຈະຍັງບໍ່ກ້າສ່ຽງທີ່ຈະລົງມືເຮັດແທ້ເນື່ອງຈາກອາດຍັງຄາໃຈເລື່ອງຕະ ຫລາດ ແລະ ລາຄາ. ຄິດວ່າຖ້າທ່ານໄດ້ອ່ານເລື່ອງການປູກເຫັດທີ່ຖືວ່າເປັນອາຊີບທີ່ໄດ້ຮັບຄວາມນິຍົມຫລາຍໃນປັດຈຸບັນອາດຈະມາຍຄວາມລັງເລ ຄວາມກັງວົນໃຈໄດ້ເປັນຢ່າງດີ ເພາະສາວໃຈສູ້ທີ່ສົມກັບຊື່ ເພັດ ມີໄຊ ປະຊາຊົນບ້ານດົງໝາກຄາຍ ເມືອງ ໄຊທານີ ນະຄອນຫລວງວຽງຈັນ ໄດ້ປະສົບຜົນສຳເລັດໃນການປະກອບອາຊີບນີ້ເປັນຫລັກມາແລ້ວຈົນຄອບຄົວມີຊີວິດການເປັນຢູ່ນັບມື້ດີຂຶ້ນ

ເຖິງວ່າຍ່ານທາງອາດອ່າວໄກແດ່ແຕ່ດ້ວຍອາຊີບດ້ວຍຄວາມຕັ້ງໃຈຫາອາຊີບດີໆມາບອກມາເລົ່າ ໃຫ້ຮູ້ນຳກັນ,ຜູ້ຂຽນຈຶ່ງບິດຄັນເລັ່ງລົດຈັກໄປຫາເປົ້າໝາຍທີ່ໄດ້ນັດກັນໄວ້ແລ້ວ ຊຶ່ງດ້ວຍໄວ 33 ປີແລະອາຊີບຂອງທ່ານນາງ ເພັດ ມີໄຊ ນັ້ນມັນມີຫລາຍ ຈຸດທີ່ໜ້າສົນໃຈ“ຂ້ອຍເປັນຄົນແຂວງຫົວພັນດັ້ງເດີມ ໂດຍໄດ້ຍົກຍ້າຍມາຢູ່ນະຄອນຫລວງວຽງຈັນກ່ອນໜ້ານີ້ 3 ປີຄືປີ 2017 ຊຶ່ງເດີມແລ້ວຂ້ອຍຕັດຊຸດໄໝຕາມການສັ່ງຈອງຂອງລູກຄ້າ ຖາມວ່າພໍໄດ້ຢູ່ບໍ່ ກໍ່ພໍໄດ້ຢູ່ແຕ່ຊີວິດຄອບຄົວບໍ່ມີຫຍັງດີຂຶ້ນອາດເນື່ອງ ຈາກສະພາບເສດຖະກິດໂດຍລວມຫຍຸ້ງຍາກ. ແນວໃດກໍ່ດີເມື່ອໄປຫັ້ນມານີ້ເຫັນຫລາຍຄອບຄົວປູກເຫັດຂາຍຄືວ່າຊີວິດການເປັນຢູ່ຂອງເພິ່ນດີຂຶ້ນຢ່າງປະຈັກຕາກໍ່ເລີຍຕັດສິນໃຈໄປຮຽນ​ປູກ​ເຫັດ ແລະ ໄດ້ລົງ ມືປູກໂຕຈິງ​ແຕ່​ກໍ່ບໍ່​ປະສົບ​ຜົນ​ສໍາ​ເລັດ. ຕອນມາຢູ່ນະ ຄອນຫລວງໃໝ່ກໍ່ຍັງເຮັດອາຊີບຕັດເຄື່ອງຄືເກົ່າຈົນ ​ມາ​ຮອດ​​ຕົ້ນເດືອນກັນຍາປີຜ່ານມາອາຊີບທີ່ເຮັດນີ້ນັບມື້ສຸດສ້ວຍຍ້ອນ​ສະພາບ​ເສດຖະກິດ​ຂອງ​ຄອບຄົວ​, ເສດຖະກິດໂດຍລວມ​ຫຍຸ້ງຍາ​ກຫລາຍ ແລະ ກໍ່ມີຮ້ານຕັດຫຍິບຫລາຍຮ້ານແຂ່ງຂັນກັນ ຈຶ່ງຫັນມາລ້ຽງ ດ້ວງໝາກພ້າວ ແຕ່ຄວາມຕ້ອງການຂອງຕະຫລາດບໍ່ຫລາຍ ແລະ ຕົ້ນທຶນກໍ່ບໍ່ຫລາຍແດ່ຈຶ່ງເຊົາ.ຈາກ ນີ້ຈຶ່ງ​ຕັດສິນ​ໃຈ​ໄປ​ຮຽນ​ວິທີ​ປູກ​ເຫັດ​ອີກ​ເທື່ອໜຶ່ງ​ຢູ່ສູນຝຶກອົບຮົມໃນນະຄອນຫລວງວຽງຈັນລະຫວ່າງ 2-3 ມື້.ເມື່ອໄດ້ບົດຮຽນແລ້ວກໍ່ລົງປູກ ຜິດແດ່ຖືກ ແດ່.ແນວໃດກໍ່ດີພາຍຫລັງ​ເຮັດ​ຕາມ​ແຕ່ລະ​ຂັ້ນ​ຕອນທີ່ໄດ້ຮຽນມາ​ທັງສຶກສາ​ໃນ​ຢູທູບ​,ເຟສບຸກ​ 1 ​ເດືອນ​ສຸດທ້າຍແລ້ວກໍ່​ປະສົບ​ຜົນ​ສໍາ​ເລັດ

​​ຜູ້ຂຽນກວາດສາຍຕາໄປມາໃນໂຮງປູກເຫັດຂອງສາວ ເພັດ ຊຶ່ງກໍ່ມີທັງ​​ເຫັດ​ນາງ​ລົມ-​ນາງ​ຟ້າໜ້າຈະມີ 400-500 ກ້ອນນີ້ແຫລະ ແລະ ຂະນະນັ້ນກໍ່ໄດ້ຍິນລາວເວົ້າວ່າ:​ເມື່ອເຫັນ​ຕະຫລາດຕ້ອງການ​ນັບ​ມື້​ນັບ​ຫລາຍນັ້ນກໍ່​​ໄດ້​ເລີ່​ມ​​ຂາຍທາງຕະຫລາດ​ອອນ​ລາຍ ແລະ ກໍ່ໄດ້ຮັບ​​ຜົນ​ດີ​ ຊຶ່ງເຫັນໄດ້ໃນປັດຈຸບັນມີ​ລູກ​ຄ້າສັ່ງ​ຜ່ານ​ອອນ​ລາຍ​ນັບ​ມື້​ເພີ່ມ​ຂຶ້ນ​.ສິ່ງທີ່ ເພັດ ເວົ້າ​ນັ້ນສະທ້ອນໃຫ້ເຫັນວ່ານີ້ຄືຜົນສຳເລັດເບື້ອງຕົ້ນໃນການປະກອບອາຊີບປູກເຫັດຂາຍ ແລະ ເປັນການສະທ້ອນໃຫ້ເຫັນອີກວ່າ:ຢ່າມົວແຕ່ນັ່ງຄຸມຂະມັບ ຢ່າມົວ ແຕ່ນອນເອົາມືກ່າຍໜ້າຜາກ ຫາກບໍ່ຕັ້ງໃຈຫາທາງອອກໂດຍຕົນເອງ ແລະ ເມື່ອປະສົບຜົນສຳເລັດແລ້ວກໍ່ໄດ້ກຳເອົາໂອກາດອັນດີໆງາມໆສືບຕໍ່ຂະຫຍາຍຫົວຄິດ ເພີ່ມຄວາມມານະອົດທົນຕື່ມ ໃຈໃຫ້ມັນພັດທະນາໄປເລື້ອຍໆໂດຍເປົ້າໝາຍຄືການ​ປູກ​ເຫັດ​ໂຄນ ຫລື ເຫັດປວກນ້ອຍ ​​ທີ່ພວມ​ໄດ້​ຮັບ​ຄວາມ​ສົນ​ໃຈ​ຈາກ​ສັງຄົມ​ເປັນ​ຈໍານວນ​ຫລາຍ

ກ່ອນອຳລາຈາກ,ນາງ ເພັດ ມີໄຊ ​ໄດ້​​ເວົ້າວ່າ:ການປູກເຫັດນາງລົມ-ນາງຟ້ານີ້ລ້ວນແຕ່ມາຈາກຄວາມຮັກ-ມັກ ແລະ ຕົ້ນທຶນການຜະລິດກໍ່ອ່າວໜ້ອຍ ຜົນໄດ້ຮັບບໍ່ແມ່ນເງິນກຳໄລເພາະຜົນໄດ້ຮັບທີ່ ແທ້ຈິງຄືຄວາມສຸກທີ່ໄດ້ເອົາໃຈໃສ່ສິ່ງທີ່ເຮົາເຮັດກັບມືເຮົາ ເອງ.ຈາກນີ້ຈຶ່ງຕັ້ງໃຈວ່າພ້ອມຈະຂະຫຍາຍການປູກເຫັດແນວພັນໃໝ່ເພື່ອຮອງຮັບຕະຫລາດໃນອະນາຄົດ.ສໍາລັບເຫັດນາງລົມ-ນາງຟ້າ ຂາຍໃນລາຄາ 20.000 ກີບຕໍ່ກິໂລ,ເຫັດໂຄນ ຫລື ເຫັດປວກນ້ອຍ 40-50 ພັນກີບຕໍ່ກິໂລ,ສ່ວນເບົ້າເຫັດນາງລົມ-ນາງຟ້າ 2-3 ພັນກີບຕໍ່ເບົ້າ,ເຫັດໂຄນ 7-8 ພັນກີບຕໍ່ເບົ້າ.ຖ້າທ່ານໃດຫາກສົນໃຈປູກເຫັດນາງລົມ ນາງຟ້າ ກໍ່ເຂົ້າໄປສຶກສານໍາລາວໄດ້ຢູ່ ບ້ານດົງໝາກຄາຍ ຫລືຖ້າໄປບໍ່ຮອດຈອດບໍ່ເຖິງກໍ່ສາມາດຕີສາຍ ໄປປຶກສາກໍ່ໄດ້ຕາມໝາຍເລກ 020 23397880

ທີ່ມາ: ປະເທດລາວ Pathedlao

Author: loveyim